итгэл

Сүүлийн хэд хоногийн сонирхолтой БИЧЛЭГҮҮД

2009-11-12T15:53:00.000+08:00

240 орчим блогоос сонирхолтой, хэрэгтэй, бодууштай санагдсан бичлэгүүд:

1. Steve Jobs and … -Эрдэнэтээс УБ-т Японы элчингийн шалгалт өгөхийн тулд Нүүрсний богоон дээр туулайчилж ирж байсан асрамжийн газрын өнчин хүү Харин одоо Лондон- Токио хооронд Банкныхаа топ менежменттэйгээ цуг тусгай онгоцоор нисдэг болчихсон тухай гэх мэтчлэн маааашшшшш сонирхолтой түүхүүд. Латинаар бичсэн сүүлийн энэ түүхийг төвөгшөөлгүй уншчихад харамсахгүй л болов уу.

2. HERO- Сүүлийн хэд хоногт багтахгүй боловч заавал оруулмаар санагдсан нэг бичлэг

"Үүнээс хойш, түүнээс цааш би баргийн юмыг бол даваад гарчихаж чадна гэдэгтээ маш итгэлтэй болсон шүү" гэсэн мессежийг нь олон хүн уншаасай гэж хүсэж байна. Баргийн юмыг даваад гарчих чадалтай болсон хүмүүсийн тухай нэг бичлэг хийнээ, may be next post.

3.
Chess, poker and other games people play
Хэн нэгэн хүн танд шатар, хөзөр тоглож харагдаж байж болох юм. Үнэндээ бол шатар юм уу хөзөр тоглоогүй байдаг.

Тамхинаас гарсан тухай яриа бол тамхинаас гарсан тухай яриа байдаг боловч үнэн хэрэгтээ тамхинаас гарсан тухай яриа байдаггүй. Хөл бөмбөгийн тухай ном хөл бөмбөгийн тухай хүүрнэдэг боловч үнэн хэрэгтээ хөл бөмбөгийн тухай биш л байдаг байхгүй юу тэй?

may be next post гээд дөнгөж сая амалсан поостоо энд бараг л биччихлээ дээ.

4. Гологдсон нь

дандаа шинэ юм хайж байх хэрэгтэй байдаг, эс бөгөөс өмнө нь үзэж харсан уншсан юмнууд толгойнд орж ирээд яг өөрийн гэсэн төсөөллийг disturb хийгээд байдаг

хэмээн бичсэн энэ бичлэгээс багшийнх нь шахалт шаардлага шавь нарынх нь хөгжилд ямар их тус болохыг төсөөлөх гээд баршгүй.

5. КТМС - ийн талаар сэтгэл ханамжгүй зүйл их байгаа хэдий ч

бэрхшээл зовлон дуусахгүй нь ямартай ч энэ сургуулийг төсгөнө. Төгссөн хойноо нэр хүндийг нь хөөдчихгүй л явахыг хүснэ... Эцсийн эцэст юм сурах эсэх нь зөвхөн хувь хүнээс л шалтгаална. Тийм болохоор интернет гэдэг сайхан зүйлийг зөв зүйлд зориулан сайн сурч, сайн хүн болж Монголынхоо хөгжилд жаахан ч болов нэмэр болцгооё
гэж бичсэн шаардлага, чадвар өндөртэй бас өөдрөг оюутны бичлэг.

Дээрх хоёр бичлэг дэх багш сургуулийг өөрийн эрхгүй харьцуулмаар болж байна билээ.

Гэхдээ л КТМС бол КТМС, сэтгэгдлүүдээс харсан ч тэр. Иймэрхүү шаардлага, чадвар өндөртэй хүмүүс, оюутнууд байж л байгаа газраа хөгжиж сайжрах ундэс шалтгааныг нь бий болгоно, энэ чинь л хөгжил дэвшлийн түлхүүр шүү дээ ч гэх шиг :D

6. Маркетерүүд хаачих вэ?

Хэн нэг овсгоотой блогчин нь үүнийг Монголд ч бас эхлүүлж болно шүү дээ. Тэгвэл ч үнэд ороол ороол явчих боломж байна.

7. Санал асуулгын хөгжилтэй түүх

Хөгжилтэй блогууд зөндөө зөндөө, гэхдээ энэ улс улсын онцлогийг харуулж чадсан, хэмжээ жижигхэн ч их зүйлийг өгүүлсэн түүх байна

8. Нэгэн биений минь нөгөө тал.... Хань минь дээ....

Хайр, санан мөрөөдөх, хүн хүнээ үгүйлэх, хүнээрээ дутагдах... олон л юм бичмээр байна. Гэвч Учраагүй яваа хүнийг ингэж энхрийлэн бодож чадна гэдэг ямар агуу их хайрын нарийн эмзэг, тансаг мэдрэмж вэ гэж толгой сэгсрэм ..
Миний энэ тайлбар бичлэгийн дэргэд бүхэл бүтэн армаан тууж болчлоо :D

9. Шоовдор хот

Хотын даргыг намаас биш иргэдээсээ шууд сонгодог байж л хот хөгжиж, тэр хүн иргэдийн өмнө хариуцлага хүлээж, хэрэв ажлаа хийж чадахгүй бол санал асуулгаар огцруулдаг баймаар.

Улаанбаатар хотын даргыг хотын иргэд өөрсдөө сонгох ёстой.

Сэтгэгдэл: anjigai | 2009-11-11 11:41:41

БЛОГ-т биш сонинд гаргавал их хүн уншина даа. Арай жаахан богино байдлаар бичвэл харин Блогчид унших байх. Урт бас баахан албаны хэллэг.

Энэ сээгий нь бас гоё!!! хэхэ, голыг нь олоод хэлчихсэн, хэхэ.

10.
Маникураас Амьдралын Хүрд хүртэл

Хэрэгтэй гэдгийг нь мэдэж байгаа л бол уртаас нь айж залхуурч орхимооргүй бичлэг шүү.

Өмнөх бичлэгүүдээс нь энэ дашрамд санал болгоё:
Салхинд туугдах навч Labels: өчүүхэн би бээр Зохиогчийн хүсэлтээр болон зөвшөөрлөөр орчуулан аядах зориг гаргасан болно гэдгээс нь номын орчуулга гэдгийг нь харж байгаа байх, сайхан ном билээ.

11. Итгэл гэж чухам юу вэ?
Бусдад үнэнээсээ итгэж хайрлавал, буцаагаад үнэнч байдлын үр дүн аз жаргалтай харилцааг мэдрэх, бий болгох тухай.
Яг энэ санааг илүү дэлгэрэнгүйгээр
The 8th habits (by Stephen Covey) номноос уншиж болох юм. Энэ номноос итгэлийг бусдад өгөх тусам асар хурдтайгаар эргэж арвижиж ирдэг, өгөөжөө өгдөг тухай хэдэн жилийн өмнө уншиж байсан.

Эдгээр бичлэгийг шилж сонгохдоо гол нь хүнд хэрэгтэй санаа, утга учир, ашиг тус :D, үр нөлөөг нь бодолцлоо.

12. Эцэст нь нэг бичлэг нэмье:

хүүхдийн төлөө за гэж хэлцгээе

"Монголын минь ирээдүй гэрэлт наран мэт мандан бадарч байхын төлөө энэ төвийн үйл ажиллагааг дэмжиж та хандив өргөхийг хүсвэл Обод-той obod1130@gmail.com эмэйл-р холбогдох боломжтой. Танд баярлалаа" энэ бичлэгийг заавал уншиж сэтгэлээрээ дэмжээрэй.

- Ядуу хүнд туслахдаа битгий бардаж сайрх. Ийм бололцоо олдвол баярлаж бай. Буян үйлдэхдээ сайрхаж болохгүй, бүх л ертөнц чи өөрөө биш үү? Чиний замд ядуу хүн тааралдаж түүнд туслах бололцоо олдвол чи баярлаж бай. Авч байгаа нь биш, харин өгч байгаа нь буян үйлдэж байгаа хэрэг гэж Теодор Драйзер "Гудиггүй эр" зохиолынхоо төгсгөлд хэлсэн байдаг.

өнгөрсөн сард уншсан номууд

2009-11-05T21:14:00.019+08:00

1. Alan Wallace: Анхаарлын хувьсгал.
Анхаарлаа, бодол сэтгэлээ захирч сурахад хэрэгтэй гарын авлага гэж болно. Тодруулбал Бясалгалын тухай ном. Онцлог нь илүү их шинжлэх ухаанч арга барилаар бичигдсэн, бясалгагч-practitioner дээрээ нэмээд шинжлэх ухааны судлаачийн судалгааны бүтээл. Монгол хэл дээр орчуулагдсан, Интерномын дэлгүүрт байгаа.

2. Гэвш Жамба Тинлейн Шаматха- ухаанаа төвлөрүүлэхүй, the best practitioner`s гайхалтай туршлага
Дээрх 2 номд гардагаар анхаарлаа хөгжүүлж чадвал, ажил төрөл, ахуй амьдрал, бизнесийн амьдралд асар том өөрчлөлт гарч хэн ч бай хүсээд байгаа амжилтдаа хөнгөхөн хүрнэ, гагцхүү анхаарлаа тэгж төвлөрүүлж сурах нь хөнгөхөн хүрэх зүйл биш юм байна гэдгийг ухаж ойсон.

Дээрх линкээр ороод бүх лекц, номыг нь Орос хэл дээр уншиж болно,
Энэ ном нь монгол хэл дээр орчуулагдсан, Их Хөлгөний уламжлалыг хадгалах төвд зарагдаж байгаа. Орчуулгын найруулга нь хаа нэг газраа жаахан тиймэрхүү байсан, гэхдээ гоё ном.

Монголд Гэгээн гэрэл, Оюун ухаанаа ариусгахуй гээд 2 ном нь бас орчуулагдсан байсан. Гэгээн гэрлийг нь хүн бэлэглэхээр нь залхуурч залхуурч уншсан, уншаад энэ хүнийг шууд шүтсэн.

3. Еше ламтан: Becoming your own therapist Expanded edition including Make your mind an ocean хэмээх ном нь жинхэнэ wisdom-мэргэн ухаан гэж юу гэдгийн бодит жишээ. Би өөрөө цаасан хэвлэлээр нь уншсан.

4. Зопа Ринбүүчий ламтан: "Making life Meaninful" ном

GE-н CEO байсан Jack WELCH-ийн WINNING номынх нь нүүрэн дээр Warren E Buffett-ын "ҮҮНИЙГ БАЙХАД өөр менежментийн ном унших хэрэггүйм" гэсэн үг байдаг даа.

Түүн шиг Ламтаны энэ номыг "THIS COULD BE the most important book you ever read" гэж нэг эрхэм тодорхойлсон байсан. Дээрх линкээр ороод мөн адил уншиж болно, итгэл нь цаасан номоор нь уншсөөн. Үнэхээр гайхалтай сайхан сэдэл, буянтай санаанууд өгнө чиг, төрнө чиг.

5. Г.МАЛАХАОВ: Үйлийн үрийн мөн чанар
заавал унш гэхгүй, уншихад харамсахгүй л ном, ямар хүмүүс гей болж төрдгийг энэ номноос ойлгох шахлаашт :D

6. Зопа Ринбүүчий: Сэтгэл амирлахын үүд

зуурсан гурилыг ямар ч дүрсэд хувиргаж болдогийн адилаар өөрийн сэтгэлийг хүссэн зүгтээ залж болох билээ---- иймэрхүү л утгатай ном байсан санагдав.

Ницще: Заратустра ингэж хэлсэн уншсаар л байна.
Бхагавад Гита уншсаар л... энэ 2 ч мөдгүй байхөө, хааяа л нэг харж байна.

ингээд тоолоод тоочоод байвал илүү их "итгэл зүтгэл":P -тэйгээр (itgelzutgel гэдэг URL нэрээ харахаар л инээд хүрээд байх юм, хиа хиа) уншиж сурч мэдэх болбуу гэж бодоод хойшид тоочиж байхаар шийдлээ.
Ядаж л лаг олон лаг ном уншдаг хүн болж таанууст харагдахын тулд залхууралгүй унших байх гэж горьдоод :P

Та дэлхий нийтийн өмнө хариуцлага хүлээдэг үү?

2009-11-01T12:37:00.006+08:00

Хүн болгон дэлхий нийтийн өмнө хариуцлага хүлээсэн байдаг гэж Дээрхийн гэгээнтэн Далай лам хэлжээ. Дэлхий дахинд хувь нэмрээ оруулж чадах ганц ч гэсэн үйлдэл юу байж болох вэ гэсэн асуултад тэрээр хариулахдаа:
- би өөрөө хэзээ ч ваннд ордоггүй, зөвхөн шүршүүрт ордог. Ванн нь маш их ус үрдэг, дэлхийн олон газар ундны усны дутагдалтай байна. Цахилгааныг хэмнэх нь бас маш чухал. Би өрөөнөөсөө гарахдаа гэрлээ унтраадаг. Энэ бол ухамсаргүйгээр хийгддэг болтлоо хэвшсэн зүйл маань. Иймэрхүү үйлдлүүд маань миний зүгээс хүрээлэн байгаа байгаль орчиндоо оруулж байгаа бяцхан хувь нэмэр юм гэжээ.

Хэрвээ та Залхуу бол үүнийг уншаарай

2009-10-30T12:23:00.004+08:00

Блогууд уншиж байсан чинь яагаад байгаан бүү мэд, залхуу хүрээд байхын хэмээн залхуураад байгаадаа их харамсаж байгаа боловч залхуугаа дийлж чадахгүй байгаа хүмүүсийн яриа нэлээд тааралдлаа.

- Юуны төлөө залхуураад байгаа билээ? хэмээн өөрөөсөө асуугаад үзье л дээ.

- Ядуурлын төлөө
- Арчаагүйтлийн төлөө өөр юуны төлөө эс байх билээ
Өөрийнхөө хүсэл мөрөөдлүүдийнхээ жагсаалтыг гаргаад тэр бүхэнд хүрэхгүйн төлөө байж таарна байх.
Залхуурвал юунд хүрч болох тухайгаа
залхуурахгүй бол юунд хүрч чадах тухайгаа
нэг бүрчлэн дэлгэрэнгүй жагсаалт гаргаад үзээрэй.
Залхуурч ядуурал, арчаагүйдэл, доройтолд живсэнээс болоод ядаж л одоо улыг тань долоох шахдаг өөдгүй хүмүүс бүү хэл, өөрийг чинь чин сэтгэлээсээ хайрлан хүндэтгэдэг найз нөхөд танил талууддаа дорд үзэгдэх гэх мэтчлэн харилцаа, сэтгэл зүй гэх мэтээр амьдралын бүх тал дээр юу алдахаа тооцоод үзээрэй.
Залхуурах болгондоо үүнийгээ санаад байвал та залхуурлыг амжилттай даван туулж, магадгүй одоо хүсэж мөрөөдөж ч зүрхлээгүй, эсвэл төсөөлөөчгүй байгаа тэр нэгэн амжилттай, гайхамшигтай эрхэм болсон байх вий.

Эсвэл та энэ залхуу нохой шиг яг ингээд л балрахыг хүсч байна уу

Үүнийг хүсэхгүй байгаа бол та залхуурах болгондоо хамгийнхаа хорон, хоржоонтой, тохуутай өнгөөр:

- Юуны ч төлөө залхуурах юм билээ дээ хэмээн хорхойтой арааныхаа завсраар сийгүүлэн хэлээд хариулт болгон шууд ажилдаа шамдан орж бас болох л юм даа... :D амжилт хүсье.

Хоосон завь

2009-10-28T12:50:00.000+08:00

Зэнгийн агуу мастеруудын нэг Ринзай (Лин Чи): “Би залуудаа завиар явах их дуртай байв. Надад нэг жижигхэн завь байсан тул би нууранд ганцаараа явах боломжтой байлаа. Нууранд би хэд л бол хэдэн цагаар байдаг байв. Нэг сайхан үдэш завин дээрээ, нүдээ аниад бясалгаж байхад минь энэ явдал тохиолдсон юм. Нэг хоосон завь урсгал даган хөвж ирээд миний завийг мөргөв. Нүдээ аньсан байсан тул би “Завьтай хүн ирээд миний завийг мөргөчихлөө” гэж бодоод уур хүрлээ. Нүдээ нээгээд би уурандаа тэр хүнд юм хэлэх гэтэл завь хоосон байх нь тэр. Тэр завь урсгал даган хөвж ирээд миний завийг мөргөчихсөн ажээ. Тиймээс надад яах ч арга байсангүй. Хоосон завинд уураа гаргах арга байсангүй. Би нүдээ анилаа. Уурласан хэвээр, уур тэндээ байгаад байдаг, гаргах арга байдаггүй, нүдээ аниад л буцаж эргээд, уурласан хэвээр цааш хөвлөө. Яг тэр хоосон завь л надад ухаарал өгсөн юм. Тэр нам гүмхэн үдэш би өөрийнхөө доторх тэр газарт ирсэн. Тэр хоосон завь миний багш болсон билээ. Одоо хэн нэг нь ирээд намайг доромжилвол би инээгээд “Энэ завь бас хоосон” гэж хэлээд нүдээ анин өөрийнхөө дотор тал руу орно” гэж ярьсан гэдэг.

Номын хаан буюу Бхагавад Гита

2009-10-28T11:32:00.011+08:00

Номын хаадын хаан нь гэж болох номонд Ведийн гүн ухааны томоохон судар болох Бхагавад Гита зүй ёсоор орно.

Буддын шашны билгийн чинад хязгаар давсан бүхий л судар, хоосон чанар, төв үзлийн бүх сургаал номлол Ведийн судраас эхтэй юмуу гэж санагддаг. Шагжамуни Будда өөрөө энэтхэг хүн, хан хүү байсан болохоор үгүй гэх газаргүй

Төвд тангад, санскрит хэл дээрх тэр олон судар номыг цагаан толгойноос л эхлээд хэзээ сурч уншиж судлах вэ дээ гэж бодож тойрч явдаг хүмүүст бол үнэн зөв тайлбартай Бхагавад Гитаг сайн судлахад л Буддын билгийн чинадад хүрсэн, хоосон чанарын тухай гүн ухааны олон судрыг судалсантай бараг л тэнцэх болов уу.

Арванэгдүгээр хорооллын Говинда билүү, нэг тиймэрхүү нэртэй цагаан хоолны газар хоол хүлээх зуур энэ гайхалтай номыг анх олж харсан юм.

Дээдийн Ном сургаалуудыг багшийн аман уламжлалаар адис соёрхол хүртсэн багш нараас сонсохгүй бол буруу ойлгох, төөрөгдөлд орж, уншсанаасаа ч дор байдалд ордог гэдэг. Тийм ч учраас Буддын шашны нууц тарнийн ёсны ном судрууд зэргийг ван авшиг аваагүй хүмүүс уншдаггүй, уншвал номтой учирч гэгээрэлд хүрэх цаг нь хэдэн сая галваар хойшилдог гэх юм билээ. Үүний жишээ ч мундахгүй олон бий, Гитлерээс эхлээд:

Ницщегийн “Заратустра ингэж хэлсэн” хэмээх бүтээл нь байж болох хамгийн товчхон хэлбэрээр, бараг өгүүлбэр нэг бүр нь афоризмаар бичигдсэн тул дэлхийд огт ойлгогдоогүй, хамгийн буруугаар ойлгогдсон философич гэлцдэг. Ницшегийн “Заратустра ингэж хэлсэн” бүтээл дэх Заратустрагийн дээд хүнийг Гитлер буруу ойлгосноос болж дэлхийн хоёрдугаар дайныг үүсгэсэн гэдэг.

Ошо Ражнешийн “Хайр эрх чөлөө ганцаардал”-ыг нь буруу ойлгосноос болж амьдралдаа бүдчиж яваа хүмүүс мэр сэр тааралддаг.

Бхагавад Гита бол дээрх номуудын нэгэн адил тоос шороонд будангуйрсан оюун ухааны хүчээр биш, хиргүй ариун сэтгэл зүрхээрээ унших ёстой ном тул буруу ойлгогдож, буруу тайлбарлагдсан барууны эрдэмтэн судлаачдын хувилбар тоймгүй олон.
Үлгэрлэвэл Ламрим буюу Бодь мөрийн зэргийг Дээрхийн Гэгээнтэн биш, харин сахил санваар үгүй, харанхуй мөхөс над мэтийн амьтан тайлбарлаж байгаатай адил юм даа.

Харин аз болоход номын багш нарын гинжин хэлхээгээр дамжин ирсэн “Бхагавад Гита анх айлдсан төрх байдлаараа” хэмээх нэрээр Монголд хэвлэгдэн гарсан байна билээ.

Бхагавад Гитаг шууд уншихад хэцүү, хүндрэлтэй хэдий ч энэ хувилбар нь номын жинхэнэ багшийн тайлбартай, тийм болохоор элдэв хүндрэлгүй. Энэ хувилбарын тайлбарыг Буддын шашныхаар бол Далай ламтай адилтгаж болох Хинди шашны чин бишрэлт багш хийсэн ном юм билээ.
Энэ номыг орчуулан гаргасан хүмүүс нь ч гэсэн орчуулагч тэр энэ гэж нэрээ тавиагүй нь биширмээр. Дээр үеийн ариун дээдийн ном судруудыг зохиосон хүмүүс нэрээ огт дурддаггүй байсан гэдэг.
Гэтэл хүмүүс бид хаа таарсан газраа, жорлонгийн ханан дээр хүртэл нэрээ сийлдэг зуршилтай биз дээ. Хүн гэгч тийм л их алдарших, нэрээ үлдээх дотоод хүсэлтэй байх юм.
Нэрээ ч тавихгүй орчуулсанс, нэр алдар, ашиг олз хайдаггүй,чин бишрэлт тэдгээр хүмүүс энэ номоо хүссэн хүн нь олж уншиг хэмээн интернэтэд татаж авч болох хувилбарыг нь тавьсан байна билээ.
Номыг нь олж авахаасаа өмнө тэр сайтаас нь татан авч уншиж эхэлсэн юм. Гэтэл одоо номтой болоод 5-6 сар болох гэж байгаа ч уншиж барахгүй л байна. Номыг ийм удаан уншиж байсан түүхгүй, гайхалтай удаан уншиж байна даа.
Мөхөс миний ухаан хомсдох иймэрхүү номыг үзэхдээ яг тэр замаар нь замнаж, өөрийн биеэр үзэж туулсан, хий хоосон номлооч биш, харин сэтгэлдээ номоо дадуулж биеэрээ харуулж буй хүмүүсийн тайлбар сэлттэй номыг нь уншихыг чухалчилдаг. Хэвлэгдсэн хувь нь дууссан гэсэн тул бөөн эрэл сурал болж байж ганц ширхэг ( “Бхагавад Гита анх айлдсан төрх байдлаараа”) хуучин ном олж авсан юм.

Харин Бхагавад Гитагийн өөр нэг хувилбар саяхан орчуулагдсан дуулдсан. Тэр нь дээрхээс ондоо хувилбар шиг билээ.
Энэ бол номын хаадын хаан нь гэж хэлье дээ, мөхөс би энэ ариун номын талаар өөр юу хэлэх билээ. Монгол хувилбар байгаа нь азтай хэрэг.

http://www.veda.mn/ сайтаас татан авч уншиж болно.
Монгол дээр байхгүй Ведийн өөр бүтээл, зохиолын тухай материалаар дараа цуврал блог бичих байх. Бичнэ ээ л гээд байдаг, хорвоо дэлхий уудам хийх ажил их гэгч болж байна даа :D.
Энэ сайтыг блог дээрээ ведийн соёл гэсэн нэрээр линк хийсэн байгаа.
Комментохолик надад коммент үлдээцгээгээрэй гэж хүсье, эс бөгөөс ангаж цангаад жигтэйхээн жигтэйхэн :P.

Ринзай- ганцаараа бүхэл бүтэн нэг үндэстэнд өөрчлөлт авчирсан хүн

2009-10-27T11:21:00.006+08:00

Хэрхэн өөрийгөө олж ухамсарын гүндээ хүрсэн тухай "Хоосон завь" хэмээх өмнөх бичлэгийн баатар бол Зэн буддизмын агуу мастер Ринзай билээ. Түүний хятад нэр нь Лин Чи. Японоор Ринзай гэж дууддаг.
Ринзайн сургаалыг зүгээр л тэсрэх бөмбөг гэж болно.
Жишээ нь: Буддаг дагалдагч тэнэгүүдээ түүнийг орхи. Түүнийг хаяхгүй бол та нар түүнийг хэзээ ч олохгүй гэж хэлсэн байдаг. Ингэж хэлснээрээ тэр Буддад хайртай гэдгээ, түүнийг олох хэрэгтэй гэдгийг харуулсан. Гаутам Будда гэдэг нэрийг хэрэглэхээсээ өмнө энэ нэр бол бодитой биш гэдгийг санацгаа. Сувраган дотор харагдаж байдаг будда бол жинхэнэ будда биш. Жинхэнэ буддагийн тухай та нар хэзээ ч сонсоогүй, түүнийг огт мэдэхгүй, тэр та нарын дотор байдаг. Тэр бол жинхэнэ будда. Гадна байдаг бурханыг орхиж чадвал доторх буддадаа хүрнэ. Сургаал гэж байдаггүй, ном гэж үгүй, бурхан гэж үгүй гэж тэр номложээ.
Ринзай өөрөө Буддагийн дайсан нь байгаагүй, харин дагалдагч нь, шавь нь байсан билээ.
Хятадаас Зэнгийн үрийг Японд аваачиж дэлгэрүүлсэн хүн бол Ринзай юм. Тэр Зэнгийн сургаалыг Япон хэлэнд хөрвүүлсэн төдийгүй зэнгийн соёлыг цэцэг, вааран урлал, цэцэрлэгжүүлэлт гээд юу эс байх билээ дээ, тэр бүхэнд шингээн дэлгэрүүлж чадсан гэдэг. Ийнхүү нэг хүн, ганцаараа бүхэл бүтэн нэг үндэстэнд өөрчлөлт авчирсан түүхтэй ажээ.

уншсан номноос авч үлдсэн үгс

2009-10-26T12:55:00.002+08:00

Миний НАМТАР М.К. Ганди:
- Балчир ахуйгаас хүнд суусан амьдралынхаа сэтгэгдэл хүчтэй байдаг тул хүнд аливаа сургамж хэлэх хэрэггүй.
- Нүгэлтнийг биш, харин нүгэл үйлдэхийг жигш.
- Системийг шүүмжилж болно, түүний эсрэг тэмцэж болно, харин түүнийг зохиогчийн эсрэг тэмцэх гэдэг бол өөрийгөө шүүмжилж, өөрөө өөрийнхөө эсрэг тэмцэж байгаа хэрэг мөн.

Мила богдын намтараас:

- Хэн нэгнийг өргөмжлөх нь бусдыгаа дорд үзнэ гэсэн үг

Лувсандамба. Та мөнх номноос:
- Өөрийн зальд амжилт гаргагч болон хорон төлөвлөгөө биелүүлэгчээс болж гомдол бүү гарга.
- Бид өөрсдийн гэрлийг гэрэлтүүлсэнээрээ бусдад ч мөн ийм адилхан зүйлийг хийх зөвшөөрлийг ухамсаргүйгээр өгдөг.
- Бид өөрсдийн айдсаас чөлөөлөгдөхөд бидний оршихуй автоматаар бусдыг чөлөөлдөг.
- Хүмүүсийг тэдний зан чанараас нь салангид олж харах нь агуу их хүч бөгөөд ингэснээр тэдний, нөхцөл болзолгүй үнэ цэнийг хүлээн зөвшөөрч байгаа хэрэг юм.
- Та бага тоглолт хийж байгаа явдал дэлхийд үйлчлэхгүй байна гэсэн үг.
- Мэднэ ээ гэдэг Бурханыг мэдэхийг хэлнэ.
- Бусдын алдаа дутагдлыг анхаарах нь өөрийн эго-г нэмэгдүүлдэг. Мораль яригчид хаа сайгүй. Эргэн тойрныхоо дутагдлыг бүү бод...
- Биеийг чинь хөнөөж байгаа зүйлээс биш, сүнсийг чинь тонилгож буй зүйлээс ай.
Айдсаас өөр зүйлээс айх хэрэггүй. Би яг юунаас айж байна гэдгээ бодож шинжил.
- Ажил бол сахилга батын нэг хэлбэр.
- Зогсоо зайгүй чалчдаггүй байсан бол эмэгтэйчүүд агуу их бодол уншигч байх байсан.
- Намайг шаналгаж буй энэ бодол 50; 100 жилийн дараа хэрэгсэхээр зүйл мөн үү? гэдгийг бодож бай.

хүмүүс ээ, надад урам хайрла аа

2009-10-26T00:18:00.018+08:00

Монгол хэл дээр орчуулагдаагүй философи, шашин, шинжлэх ухааны бүтээлүүдээс хүнд л хэрэгтэй бол Христ байна уу, Буддын шашин байна уу, Зэн Буддизм, Дао, ер нь аль нь бай хамаагүй, аль нэг шашны суртал номлол, ямарваа нэг үзэл бодолд баригдалгүй чадлынхаа хирээр дамжуулая хэмээн бүдүүн зүрх гаргаж байна.

Дараа дараагийн бичлэгүүдээрээ Ницще болон түүний алдарт бүтээл "Заратустра ингэж хэлсэн",
мөн "Хайр эрх чөлөө ганцаардал" номоороо Монголчуудад танил болсон Ошо Ражнаш, Дээрхийн гэгээнтэн Далай лам болон Буддын шашны ихэс дээдсүүдийн бутээл, сургаал, Зэн Буддизмын хамгийн алдартай шалгарсан агуу багш, мастеруудын тухай, зэн буддизмын тухай гэх мэт цуврал блогууд бичнэ.

Сургаж номлох чадалгүй билээ, харин уншсан дуулсанаасаа л зөвхөн дамжуулж, хуваалцах гэж бодож байгаа надад хүмүүсээ урам хайрлаарай.

Орсон гарсан та бүхэн санал бодлоо, мөн уншиж танилцахыг хүсч байгаа зүйлээ бичиж үлдээвэл би чадлынхаа хирээр олж тавихыг хичээнэ, та бүхнээс энэхүү нялх шинэхэн блогийг минь линкдэж орж гарч байгаарай гэж хүсье.